العقـــد

نقشت اسمٍ على عقدٍ يطيب لخافقي ذكره
فديت اسمه ترى يسوى ألوفٍ من أسامينا

وعلى صدره لبس عقده يا حظ عقده على صدره
يا ليت انّي مع عقده على صدره تخاوينا

نعيش اللي بقا منا على ما بان من نحره
و لا يمكن أنا و عقده نرا صدره يجافينا

ثلاثتنا نبا نبقى على عهد الوفا عشره
نبات الليل نتسامر و نصبح في تلاقينا

إذا قامت نفزّ لْها .. يطيح النّجم و القمره
يموت الليل و تحيى شمس من نوره تضوّينا

و إذا تنهّد عقب نومه فديت الصوت و النّبره
كناريٍّ صدى صوته تفشى في حوارينا

يشعّ الفرحه الحلوه يبيد الضيق و العبره
ف صوته ماتت أحزانٍ تقطّعنا و تكوينا

و لي قامت تحكّ العين يتني في العقل فكره
أقول اترك أنا الليلة حوي نحره و نادينا

و أشدّ السير لايدينه عسى لو قام هو بكره
يحكّ العين أقبّلها قبل لا العين تسبينا

و تحت رمشه يطيب لنا نخاوي اللّيل و السهره
هدب عينه نسج ظلٍّ شبه ظلمة ليالينا

و على خدّه صفا ثلجٍ و لكن شابته حمره
جريمة واضحة يا ليت مجرمها يراعينا

جمالٍ يفتن العاقل و يسبي العقل من نظره
إذا يرمش أسامينا و توالينا ينسّينا

فديت عيونه الحلوه غزاله و ظبيه و مهره
تلاقت عينهم في عينه اللي دوم تغوينا

و في طوله مع عرضه إذا يقسم على خصره
يلخبط حسبتي و ناتج مجاميعه و باقينا

و إذا يضحك دعيت الله يثبّت عقلي بصبره
و إذا طار العقل منّا وش اللّي هو بقى فينا

أحس بشوفته سَكره و أنا اللّي ما عرف سكره
و أحس عيوني المركب و حسنه شاطئ و مينا

تعبني بعده و طولة مسافات الهوى الوعره
و ذقنا من تباعدنا مراراةٍ تكفّينا

متى يا مهجة عيوني يا أجمل ورده و زهره
متى تلفي مع أمواجك و ترسي في شواطينا

متى ياللي ملكت الروح و إحساس الهوى و شعره
متى تدني مع النسمة و تسكن في أراضينا

و اضمّك بين أحضاني معك يقضي العمر عمره
أبات و صدري يلمّك و نسرح في ليالينا

و أقول و كوننا يشهد يا حظْ صدري على صدره
و أكون اللّي مع عقده على صدره تخاوينا

أقــدار

سبعه الصِّبِحْ .. نوم الجريح احتارْ
و الهمّ مبحر .. مركبه أسرار
و العِمْر ساعة ليتها اللّي هي صِفت
للّي الجفى
شوكٍ على دربه طفى
لكنّها ساعة هجير
و طعمها صوت الولهْ
رجفه تناسيه الدّفى
و قربه لصدّاته شفى .. لكنّها أقدارْ ...

في عينها سافر فؤادي للجنونْ
في عينها نبعٍ شرب حسنه عيون .. و سلّها
تستلهم أيّام العمر .. لكنّها مدّ و جزر
في حضنها تسكنْ
تظنّ الكون في أحضانها نبضه يعيشْ
و إن طعتها تستسلم أوراق المحبّه و الحبر
و تعيشها كذبة أمل
و تحاصرك لحظة غدر
تسلب خيالك ثمْ تطيش
و عقب القصر تسكن عريش
و لا دَرى حالك تفاصيل المصير .. و ما حصل
لكنـّها أقدار ...

سبعه الصّبحْ .. فكر الجريح إنهـار
دمعه تخون و تنسكبْ
تسبق في مجراها الألم
شيٍّ في تفكيره يموت و ينمحي
إحساس قلبه مع شموعه ينطفي
تعبيره و حرفه يصدّ و يستحي
حول الفرح ترقى السما أسوارْ
فوق الظما ما تنزل الأمطارْ
تحت الرماد و جمرته .. قلبٍ تِعبْ
قلبٍ مدى حزنه بصر
لسهيل يرقب غيمته
للشّمس تَحرق شدّتهْ
قلبٍ يتوق لضحكته ..
يرهن لها عمره ثمنْ
قلبٍ رفض كلّ الجفى
و العشق في صدره دفنْ
قلبٍ وِفى .. لكن ترى وش ذا يفيد
إن خانته أقدارْ ...

سبعه الصّبح
يطوي البِعِدْ أسفار
للصّدر ضيقْ و عبرةٍ زوّارْ
صوت المدينة يبتدي
يعزف من ألحان الشوارع أغنيهْ
نومٍ تِثاوبْ راحِته بين الحواري أبنيهْ
كون انشغل بالصّبح لكنْ ما درى
إنـّه صحى يطلب ذراها ..
ما لقاها ..
باعته أقدار ...

سبعه الصّبح .. وين الصّبح ؟؟
دامه شعاع الشمس منها ما شرقْ
دام الهوى و الروح منّي هو سرقْ
ليش الصبح ؟؟
دام الجفا غابةْ محبّـتنا رواها .. ثمْ حرقْ
سبعـه الصبح .. تسعـه الصبح .. عشـره الصبح ..
الوقت من يوم ارْحَلتْ وش هو فرقْ
عمرٍ يمر و عينها النجلا تغيبْ
و الناس تضحك لكن العاشق غريبْ
و اليوم يمضي و لا رضت
ترجع مع الأمطارْ
و ما هي غريبه .. خانته أقدارْ

سهــم البلاكبيــري

يا سَهَم ف بلاكبيري فوق نافذة المسنجرْ
باطلبك وصّل حبيبي بالغلا أجمل عباره

كل منْ ف القائمة خلـّه يولـّي و لا تعبـّرْ
إلا هوْ ذاك الذي له من بيوت القلب حارة

إن نصيته خاف ربّك و اذكره الله أكبر
لا تعين اللي عيونه سحرها يسوى حضارة

و في رموشه لا تحير و لا تقول و لا تفكـّر
أي نعم هو م البشر ما هو خيالٍ و استعارة

و إن حضرته ف الليالي و شفتْ شمس الصبح تنـْوِر
ذاك خـدّه إنْ لفــتْ ظلمــة دجــى ليلـي أنــاره

و إن لمحته مايلٍ بالعود في مشيه تبخترْ
ترتجف أرضٍ وطاها و تخلط الطيب بغباره

ذاك من هُوْ ف الحشا ثابت مكانه ما تغيّر
ذاك من هُوْ زلزل الإحساس و العشق استثاره

إن وصلني من مراسيله و شبّ الليت الأحمر
ترقص الدنيا ف قلبي كالـّذي لاقي بشاره

في وطن قلبي أمير و في حكم روحي تأمّرْ
لو يبا روحي فداه و تحت أمره أو قراره

و لو يبا عيني تدلل آمر و إطلب و أشّر
هذي أو هذي او الثنتين خذ ما هي خساره

الخساره إن مضى يومي و عيني لك تدوّر
ما لقتك و جا ظلام اليوم خذ منّي نهاره

و الخساره إن جفاني صوتكم ياللي يبشّرْ
دايمًا هايم أباه و ضايع بغابة وقاره

و الخساره يوم قلبي لك معاني الحب سطّر
ما لقى من صوب قلبك شيٍّ يرد اعتباره

يا غرور العشق في أمرك أنا دايم أفكر
في حياتي صرت شيٍّ يصعب الشعر اختصاره

لأنـّك أغلى من سكن قلبي بسحره و إنتي أجدر
من ملك قلبٍ عزيزٍ كمْ توفـّق ف اختياره

و لأنك أرحم من همال الغيث في صحرا و أغزر
و لأنك أنقى من صفاء الحور يا نبع الطهارة

و لأنك أحلى، لأنك أسما، لأنك أطيب، لأنك أكثر
من جمَعْ خير المعاني لين صرتي في الصداره

إنتِ شمسٍ من شروقكْ ما قدر ليلي يدثّر
نور عينك عقبها وش عاد بتفيد المنارة

يا سهم ف بلاكبيري فوق نافذة المسنجر
هاك قلبي صوب حبّي وصّله باجمل عباره

تذكرتـــك

تذكـّرتك في ظلمة ليلْ .. وساعة صمتْ .. وصفوة بالْ
تذكرتك و أنا ما كنتْ في لحظة لكم ناسي

تذكرتك و لك طيفٍ سرى حولي و بدا يختال
تذكرت العيون اللي لها كنت أحبس أنفاسي

يمر الوقت و أقول أنسى إذا مرّ الزمان و طال
تطوليبقى مركبك في داخلي راسي

غريبة كلما يسرح خيالي الواسع الجوّال
أرى طيفك يلاحقني يثير أحزان هوجاسي

غريبة كلّما أجلس مع ألوان البشر و أشكال
يغيب الكون و ألاقيني معك و يغيب جلاسي

تمنيتك هنا جنبي و شوفك أبلغ الآمال
تسامرني و تخلط طيب أنفاسك بأنفاسي

تمنيت أحضنك في ظلّ غصن ٍ وارف ٍ ميّال
و أضمّك يا بعد روحي لقلبي يا بعد ناسي

تمنيت الإله اللـّي يصلي الكون له باجلال
يجمّعنا و ثوب السّعد منّه هو لنا كاسي

أنا من شفتك و قلبي يصوغ الشعر لك موّال
و يملي شعره الهايم لكم أوراق كرّاسي

بهرتي كلّ ما فيني و عقلي كانْ .. بل لا زال
إذا يلمح طرف ظلـّك يتوه و يتبعه راسـي

أحس بهمستك نسمه تطفـّي في الحشا زلزال
و أحس بضحكتك إني غنيّ و مات إفلاسي

خدعني صوتك المرهف و أنا قلبي لقلبك مال
و ما كنت أحسب إنْ قلبكْ لعوبْ و خادعْ و قاسي

هجرتيني و سلبتي روحْ من قلبٍ غدا تمثال
هجرتيني و زلزلتي كياني من طرف ساسي

و عقب هجرك هجرتيني و تشمـّت فيني العذّال
و عذالي هم أحزاني و وحدهْ و بعض وسواسي

أحاول أحكم أفكاري و أصير إلها أنا خيـّال
أوجهها لنسيانك و أقيس الفكــر بقياسي

و لكن ترجعي و تغزي خيالي بصورةٍ تنهال
على فكري و تتجاهل دفاعاتي و حرّّاسي

أنا ميّت لأنْ طيفي غدا من فكركم رحـّال
و انت الحيّ في فكري و تملك أجمل احساسي

قصـص عشــاق

قصـص عشّـاقْ ..
حكايهْ كرّرت معنى ..
بدايتها غرام و حبْ ..
و نهايتها عذاب أشواق ..

قصص عشـاق ..
فصولٍ تكتب أوراق الخلاصه
في فهارسها ..
مشاعر كانّها ريح الشواطي
أو نوارسها ..
متاهات الولعْ و الطـّيبْ و الآخر ..
وش الآخر ..
سوى صوتٍ مداه الضيق ..
سوى دمع ٍ سكبه فراق ..

قصص عشـاق ..
قصص واقع تكَرّر في حوارينا ..
قصص ذيك الأماني اللـّي نسمّيها أمانينا ..
أنا و انتي
و هيْ و هوَ ..
على فرق المشاهد و الفصول و لونها تبقى ..
بدايات الأمل و الحبْ
و نهايات الأسى و الريحْ ..
بعثر حلمها الأوراق ..

أسافر في ذرى النسيان
و أقول أبعد عشان أنسى ..
و أصادف ضحكتج إنتي ..
و اضيع و أرتجي صمت الشوارع
بس تخذلني ..
و تقول انّج هنا كنتي ..
و أردد حيرتي و اسأل ظروف الوقت
إذا كان العِشِق إنتي
و إذا كان الفرح حضنج
و طيفٍ لج غدا عابـر
و إذا لج يسكن ف قلبي
من إحساس الهوى شاعـر ..
علامك يا قدر قلبي ؟؟
و ليش الحب يا ظروف الأمل خنتي ؟؟
تجاوبني حكاياتي
بداياتك هيام و حب
و نهاياتك طبيعية .. مآسي قلبك التوّاق
لأنك من سكن قصة
حكايه من قصـص عشـّـاق

ضيــاع الشعــر

يا كيف تضيعْ أفكاري و إنتي ملهمة شعريْ
يا كيف تجفْ أنهار القوافي و إنتي العنوانْ

قسم بالله لو غابت قصيدهْ عن مدى فكري
لأعوّضها من إحساسي قصايد سطـّرت ديوان

و قسم بالله لو ضاع الورق منّي مع حبري
لأخط الشـّعر في قلبي مدادي دمّي الولهان

و أجمّع من ثقافتنا كلامٍ شاعري سحري
أسر جمهوره بفنـّه يلين أصْبَح رفيع الشان

و أمكـّسهم شعر عنترْ و قبـّاني معَ الجمري
مع ربيـّع و أبو ماضي وشعر النابغه الذبيان

و أقوم أكتب يديد الشـّعر راقي مبدعٍ عصري
يلين أَصبـِح شكسبيـر العربْ تذكرني الأزمان

و أجمّعها بيوتٍ لك بأمري أو بدون أمري
لأن الشعر يكتبني لكم قبْـلْ أكتبه و يبان

و أصفّ الطير باشعاري تغنّيها لكم بدري
على شباكك وشمسٍ بدت ترسم لنا ألوان

و أصفّ حروفٍ لوصفك مثيره جوّها بحري
لو انْ عدّيتها ف صحرا تِنسنسْ من هوا لبنان

و إذا غبّة شعر تُكتبْ .. يا غير أكتب لكم نهري
و إذا غيري شعل ضوّه لأفجّر في الشعر بركان

حبيبي وقتنا يمضي سنين العمر به تجري
و لكن حبـّك ف يومي يزيد أكثر من اللي كان

أنا خايف على ليلى عقبنا تنّسى و تسري
وقيسٍ عاده استسلم و سلـّم لي الهوى نيشان

يا كيف تموت أشعاري و إنتي واقعي عمري
و دونج يا عسى شعري يزول و يمسحه نسيان

إمتحــاني

ليتني الطالب و ليتج امتحانيْ
وليتج دروس و مفاهيم و معاني

كنت صرت الشاطر اللـّي ف الدراسه
يحفظ لـرابع و هو في صفّ ثاني

و إنْ سألنا استاذنا من هوْ الفرزدقْ ؟
قلت شاعرْ من زمن ما هو زماني

بسّ شعره مجمله عادي لأنـّه
ما كتب فيكم قصايد أو أغاني

و إن سألني عن عصور الجاهليّـة
جاه ردّه في أقلّ من الثواني

قلت هي فتره على الدنيا عصيبة
قبل ميلادج بها العالم يعاني

و إن سألني وقال لي فسـّر وإشرح
قـولْ من علــمٍ قديــمٍ أوّلانـي

" للفعل ردٍّ لفعله هو يساوي ..
قوّته و إلا اتّجاهه شيّ ثاني "

قلت أنا عندي دليلي يا نيوتن
لاغيٍ قانونك الثالث علاني

هذا أنا فعلي أحبّه من صميمي
و ردّ فعله حب مبهم ما كفاني

و ان سألني ف ديننا الواعظ عطيته
فتوةٍ في صـدْقـَها يُســأل لسانــي

التـّأمّل في عيونــج كالعبــادة
تـُشعر الإنسان انـّه شخصْ هاني

و انّ ربّه مبدعٍ خالقْ مصوّرْ
جلّ شانه خيره المنعم كفاني

و في سؤال الصحْ خطا قالوا بأنّـه
حبـّـكم في خافقي زلزل كياني

قلت صحّ و لكن الجملة ضعيفة
لأن حبـّـه زلزل أبراج و مباني

و عقب ذاك الصح خطا إن قال علّل
القمر أيام و باقي الشّهْر فاني ؟

قلت إذا غاب القمر سيروا لبيته
يالسٍ عنده يقول انـّـه مكاني

و إن طلبني صاحبي ودّه أغشـّـش
و قال لي عطني إجاباتك عشاني

قلت له يا صاحبي اطلب عيوني
إلاّ أنا في أمْرَها دايم أناني

ودّي أحبس كل تفاصيله ف روحي
و افتح ف قلبي لإحساسه مواني

و أبهر العالم إذا صرّح بحبّه
و أهجر الدنيا إذا خان و نساني

كم دعيت الله و أنا طايف ببيته
بين فوج الناس و الركن اليماني

يجعله إن كان خيره من نصيبي
و يكتب الفردوس لي بيتي و جناني

إمتحانك صعب للدنيا و لكن
ما اسْهله ما بهْ سؤالٍ هو عصاني

فوق هذا قبل اسلّمها الإجابة
بامسحَهْ ياللّي كتبته ف امتحاني

و أرتجي الصّفر الّذي يكتب رسوبي
لأجل أعيدك و أمتحن في دور ثاني

وش فـَــرَق؟؟

تسأليني ..
هذا شعرٍ يكتب إحساس المشاعر
و ذاك مثله .. دونها يُكتب على نفس الورق
وش فـَـرَقْ ؟؟

لحظة لحظة ..
خلـّني أستوعب الأفكار لانـّه في سؤالك ..
فكرةٍ تستوجب التفكير لحظة و النظرْ
و عنصر الفجأة
تفاصيل الإجابة من خيالي هو سَرقْ
وش فــرق؟؟

يمكن إنـّـه الاوّلي صاغ الغزل
و إبتدا في الحب خطوة للأمل
و أصبح العنوان الأوّل في الهوى محبوبته
ودّه يهاجر معاها
يفرد جناح المحبـّة في سماها
و ترقص الفرحه في قلبــه كلـّما قرّب لقاها

رغم هـذا الأمر كلـّه
هذا شعر و ذاك شعر و كلـّهم يكتب غزل
و كلهم حبرٍ سرى خطـّه على نفس الورق !!
وش فـَـرق ؟؟

يمكن انـّه الأوّلاني
في بحـور الشوق أبحر في سفينة
قلبه الربّان دومه في تفاؤل
ما حسب للريح و الموجة الحزينة
و يوم فارق مركبه حضن السكينة و المواني
و صار وسط اليمْ و الإعصار عاصفْ
حاول يقاوم و يبقى فوق ذاك اليم واقف
لكن انّ الريح و الأقدار أقوى
و قبل لا يهوي شراعه .. في ثواني
سطـّـر إحساسه قصيده
و بعد ذلكْ هو غرق ..

بس يبقى هذا شعر و ذاك شعر
و كلـّهم يكتب قصيده
و حبرهم يسري على نفس الورق !!
يا ترى شعر المشاعر
عن خليّ البال من شعر و قصايد
وش فـَــرق ؟؟

يمكن انه ذاك أنقــى .. ذاك أتقــى
ذاك أصدق .. في زمانٍ للأسف .. صدق المشاعـر
ما لها في الناس قيمة
يوم صار الحب عاهة
و صارت أحلام المحبـّة في ثنايانـا عقيمة
يوم نام الليل عاشـقْ .. ما عرف طعم الأرق
و يوم صار الحب واثق ..
انّ عمره للنهاية .. سرعة الصوت اخترقْ

يوم حبّـيتك و لا لي
من جميع الكون غيرك لي غنيمة
يوم صار الضيق حالي
و أصبحت كلمة "أحبّك" من شفاتك لي جريمة
يوم جيت أطلب حنانكْ
ما لقيت إلا جروحٍ في فؤادي
دون قصدٍ و اهتمامٍ خطّها فيني بنانك
و جيت أكتب لك قوافي
عن شعوري عن مكانك
عن طموحاتي العظيمة
كيف ودّي انتشارك
عمرنا و بيتٍ أساسات المحبة والوفا دايم تقيمه
و جيت بأبيات و معاني
سطـّرت في صفحة العشّاق للدنيا أماني

شفتـها و بكل برودة
جيت تسأل .. هذا شعرٍ تختلط فيه المشاعر
و ذاك شعرٍ دونها يُكتب على نفس الورق
وش فــرق ؟؟

يا حبيبي يبدو انّه .. ما فرق
غير هذا الشعر حبرٍ عالورق
و ذاك مثله شعر لكن
صاحبه بهموم حبّ و عشق غيره ما احترق

و يبدو إنّي ما عرفت ألقى إجابه
مثل من في هالفلا يلحق سرابه
لكن إنتي
قولي انتي يا حياتي
فهّميني ..
وش فــرق ؟؟

فــارس أحلامــك

نعم لاني أنا الأفضل و لاني فارس أحلامكْ
و لاني من تمنّيته يشارك عمرك بعمــره

و لا الأيام وظروفي غدت وظروف أيامك
تشابه بعضها و فرق التّقارب بيننا شكـبْره

و لا ثوبي شبه ثوبك و لا عمّي من أعمامك
و لا دربي على دربك يطابق خطوتي باثـْره

و لكنّ القدر واقعْ حقيقـه تشرب أوهامك
تعلـّمنا تجاربنـا معــه ونكــوّن الخبـره

بإن الوقت و لو طوّل مصيره يطحن عظامك
على عكس الهوى تجري الرياح ومركبي وامره

ترى الدنيا و نهايتها أبدْ ما تشبه أفلامــك
سعادة خاتمة كـلّ الحزاوي دومها عَـثـْـره

و طريق الحب ولو يحلا مصيره يتقن إيلامك
تشمّ الموت في ورده عقب ما لطّـخك عطره

و أنا و الحب كم عشنا على نهرٍ من إلهامك
روى قلبٍ نبض كلـّـك و لك غنّى الهوى نبْرَه

و رتّب يكتب أبياته حروفٍ تشبه أقلامك
و حسنك يسكن أوراقي كأنّـه للشّعر حِبْره

ثلاث سنينْ و فوادي الـّـذي يشريك ما سامك
و انتــهْ للهجر كم بعت قلبٍ تحترف كسره

ثلاث سنين في عشقك وأنا الظّامي و لو صامك
نظر عيني عجزت أمْحي خيالك و أمْسَحه ذِكره

ثلاث سنيــن و الدنيا تعاندنـي و ما دامك
تساير فعلها يا كيف بعدك باقـْـدر لجبره

حبيبي في الهوى جاهل تعبت أحاول إفهامك
معاني الحب و استاذك تملـّل من كثر صبره

تعبت أنطقْ "أنا أحبّك" و أنطـّق حبّك أصْنامك
جمودك يحفر لحبّي يا عمري في الهوى قبْره

تعبت أمشي ورا ظلـّك و أتابع خطوة أقدامك
تعبت أهدي لك الفرحة و تهدي قلبي الحسره

خلاص إنْ كنت في بعدك رضيت بوحدة أيّامك
أبا أرحل و أكتم الدّمعة و أعايش حرّة الجمرة

و أبا أنسى طيفك العابر و أنكـّس أرفع أعلامك
ف قلبي و أتركه طيرك يضيْع و يختفي وكره

و أبا أمحي صفحةٍ تحوي حروفك و أمسح ارقامك
و أسافر علـّني أنـْسـى في غربــة بعدكم ذكــره

و أبا أرحم كبرياءٍ في خفوقي صابته سهامك
و أبا أمحي ضحكتك و أنسى بإنـّـك للفرح عمْره

ما دام إنّي عجزت أصبح حبيبك فارس أحلامك
و ما دام إنّ الظروف اللي تسايرها غدت وعـره

ببيع الحـب للفرقى و أصدّ و أتـْرك إلـْهامــك
ما دام إنّ الأمـل ضايـع معـاك .. و ضاعت العشره

شبيــه الـورد

شبيه الوردْ ..
ياللـّي الورد طيبه يشبه أنفاسك ..
و ياخذ من خدودك لونْ ..
و يبهر مثل عينك كون ..
و يلبس من ضياءك سحر ..
يخلط فيه إحساسك ..

شبيه الورد ..
ياللي الورد لو تجمعْه في باقة ..
يتوه ف بحر بستانك ..
و لو تجمعه في قطرة ..
و تجمع مع شذاه النور ..
يضيع فعطركم عطره ..

شبيه الورد ..
بعادك برد ..
تعالي و دثّري قلبي بصوت إلهامك الدافي ..
تعبت أكتب هواكم سرد ..
و شِعري مركبٍ هايم ..
عجز يلقى على أطرافك
مواني و شاطئ و مرسى ..
و أنا مرّت ليالي عمري الأقسى ..
على بابك
ف يوم ألقاني ف حضنك .. أعيش فحبك الحالم ..
و يوم ألقاني ف هجرك .. تقولي لي خلاص إنسى ..

أنا ما أنسى .. يا كيف أنسى ..
بإنك للفرح دنيا ..
و ما يرسم على شفاهي .. إبتساماتي
سوى بسمه من شفاهك ..
و ما يسقي عطش روحي سوى مزنك ..
تهلّ بخيرها الدافي على ذاتي ..
و ما همّي سوى همّك .. و روحي ملكك و جاهك ..
تعالي يا سكون الشوق ..
ف قلب المولع الولهان ..
تعالي نهجر ظروف الزّمن
و نودّع السّاحة ..
نطير لوعدنا المقبل
و نبني عشّنا باغصان ..
و نقفل حزننا ف صندوق قبْل يضيع مفتاحه ..

شبيه الوردْ ..
أنا ما اترك حياتي بين حظّ و لعبةٍ من نردْ ..
لأني أرسم خطوطك في أحلامي ..
و طموحي يا بعد عمري
معك أتقاسم أيامي ..
و كل ليلة قبل ما انام
أمنّي عيني و قلبي
إذا وعد الصبح يصدق ..
ألاقي بين أحضاني
سكنتي و شمسنا تشرق ..
و أباهي دنيتي .. صرتي
حلالي و نبرة أنغامي ..

شبيه الورد ..
عجيب الورد ..
من دونك و لا يحلا ..
و من دونك ولا يمكن قصص عشاقنا يملا ..
و إنتي يا حكاياتي الأميرة في عُلا قصرك
و حولك من حرس بعدك عن ايديني تحول أقدار ..
جماعة واقفه ضدي ..
و أنا اللي يا حبيبي فرد ..
لكنـّي ملكت إصرار

شبيه الورد .. ياللي الورد طيبه يشبه أنفاسك ..
و دمّه يطبع إحساسك ..
متى أقطف بداياتي معك يا كوكب الأزهار..
و أصير ف باقتــك أقرب
بشر من أهلك و ناسك .. متى يا بهجـة الأنظـار ..

غزيــر اليـــــال

تعب فكري و في أمرك تحيّر يا غزير اليال
تعب نصّ القصيد اللي ملكت و ضاع عنوانه

تعب دمع الفراق اللي لغيرك ما ذكرته سال
و حتى ضحكة الفرحه عقب فرقاك تعبانه

قبل عامين في بحرك سرى مركبْ و صال و جال
لحـبّــك في السّـمــا نجـم ٍ هـدى في اللـّيــل ربّــانه

على الله متـّـكلْ و القلب له في حبـّكم آمال
لقيت الهم في موجك و لا لاقيت شطآنــه

بداياتي أمل فرحه و نهاياتي ألم غربــال
مشاعر من يقين الحب أضحت فيك حيرانه

مشاعر خطـّها قلبي تشابه ضحكة الأطفال
براءتهـا تميّـــزها لكــم هـي دوم ولهانــه

سمعت ف خافقي نبض ٍ يردّد اسمك بموّال
لقيته اسمك الطاهر جرى في عروق شريانه

و شفت لعينج الحلوة سهر في مهجتي هو طال
تغيب الشّمس و لا غبتي و نجوم البال سهرانه

في هالعالم ترى انتي شخصْ واحدْ ذرّةٍ ف رمال
و لكن صرتي العالم ف شخصي يا اجمل انسانه

تخيـّـلت الهوى ياللـّـي روى قلبي مع الهمـّال
روى قلبج يا لين أزهر من النرجس على افنانه

و تخيلتج تحبيني مع انّـي كنت أشوف اهمال
و لكـن أعذرج و اقول أكيد اليــوم ملاّنه

تمنيتج معي نقطع على درب الهوى الاميال
نهايتنا أنا و انتي في بيت ٍ ما اروع ألوانه

نهايتنا بدايتنا سنا عشق و ولع و عيال
تصيري حبّي الثاني و الاوّل بنتنا فلانه

نجمّعهم في كل ليله و نروي قصّة الأبطال
و واحد منهم اتأخّـر يحاول يلحق اخوانه

و واحد منتبه يسأل عن القصة و عن الخيال
و اخته بين أحضانج كساها النوم نعسانه

و لكن صخرة الواقع على احلامي بدت تنهال
تحطـّـم بيتنـا و تهـدم سعادتنـا و جدرانـه

سؤالي من سنة يعصف بفكري يشعل الزلزال
في قلبك من أكون و وينْ تصنيفي في أي خانة

أنا حبّك؟ أنا لعبك؟ أنا العاشق؟ أنا العذال؟
سؤال ٍ من سنة واقف ببابك ملّ حقرانه

قبل يومين جت فكرة في بالي ماشيه تختال
و اراجع ذكريات أمسي من الماضي و نسيانه

لقيت إني أنا المخطي بلا ريب و بلا إشكال
أنا اللي ما عرفت أوزن شعورك و احسب اوزانه

أنا اللي شاف إعجابك هوى و عشق و خلط أفعال
و ترى الإعجاب غير العشق و كلٍّ يختلف شانه

طبيب الحب يوم انـّي استشرته ف امْركم هو قال
ترى ما لك وطى ف قلبه و غيرك يسكن اركانه

عمومــًا لك أنا اتعــذر و أنا آسف على كل حال
حصل خير و ترى ما اظنْ تكوني اليوم خسرانه

أنا آسف مزن قلبي على قلبك عشقها سال
ملا أرضه و ضاقت به سما قلبك و وديانه

و أنا آسف على عشق ٍ لكم صغته أنا بخبال
و انا آسف على شعر ٍ سجن اسمك بديوانه

أنا راحل مع الذكرى بفكر ٍ من تعبكم نال
جروح ٍ ما علمها غير رب العرش سبحانه

و لكن قبل اودّعكم أمانة حطــّـني عالبال
تذكـّرني إذا جاك النصيب يرف جنحانه

تذكرني إذا شخصه صدمكم يا غزير اليال
تذكـّـرني إذا بانت ألاعيبه و نكرانــه

و لا تنسي إذا شفتي لكم يتعمــّد الإهمال
بإنج كنتي العــــــالم في شخصي يا "اجمل انسانه"