في عيونك

في عيونك ليلْ ما بين النهار
في عيونك دنية إحساس و قصايد
في عيونك غيمٍ و بردٍ و نار
تنطفي أحيان و أحيانا تزايد

كل ليلة يسهر ف عينك قمر
و كل ليلة حسنك الدنيا غمر
إن زعلتي ترسم دموعج على الدنيا حصار
و إن رضيتي 
تسكن قلوب البشر فرحة زهر

يا خجوله
ملّت الدنيا انتظارك
أشرقي في كوننا يمكن يطيب
الزمن في ضحكتك وصفه عجيب
 كلّ عامٍ يوم ميلادك يمرّ و ما يمرّ
توقف الدنيا تعايد
و كلّ عامٍ يحصي العالم عجابه
و ما لقى مثلج فرايد
يا سكون الليل و عيون المها
و يا نهارٍ طال في شوفك سَهى
 في عيونك ريحْ .. أنهار و سفرْ
إن لمحها الضيق غادر و انتهى
و في عيونك بيتٍ و طفلٍ غريب
و قلبك الطيّب مدينة
مرّةٍ فيها ينام
و مرّةٍ فيها لَهى

مرّني في يوم نسناس الهبوب
 و قال لي شخبار من عينه قلايد 
هو صحيح الوقت في وجهه شحوب
قلت له هذي تخاريف الجرايد
النواعس ليلْ و عيونه شموس
و الفرح و الطيب في قلبه عروس
في عيونه صدقٍ و جنة وقار 
و في عيونه دنية إحساس و قصايد

وقتي سعيــد

وقتي سعيد
ويّاك أنا وقتي حلا
ياللّي معك
أنسى الحزن و إنّي وحيد
قلبي بضحكاتك سلا

كلّ الهموم
مرّت على بابي تعيد
لحظات من ضيق الصّدر
تسرق تفاصيل العمر
و ذاك الذي علّق فؤادي للبعيد
و كنت الوحيد
لين أشرقت شمسك
نهارٍ ما تعدّاه العصر

ليه أستحي
و ما أقول إنّك
بلسم جروح الزمان
ليه أستحي
و ما أقول أنا اللي
شفت من قلبك حنان
ياللّي شِبَهْ ضيّك قمر
و ياللي قصيدي عقب موته
عاد يكتب لك سطر
و ما عاد يومي ينتظر
وياك أنا يومي جديد
و وياك أنا وقتي سعيد
أحلا من أنفاس العطر
رجّع لي البسمة و زان
جوّي و روحي و المكان
إسأل ثوانينا تقول
إنّي معك وقتي سعيد
و انته معي دايم سعيد
ياللي شِبَهْ ضيّك قمر

التغروده

سلّيت شعري و القلم بهْ شاهرْ
و القافيه تِرْكب على التّغروده

ودّي كلامٍ في وصوفه ماهر
حلٍّ لبو ناصر و يطرب مُوْده

و اسْعفْ خيالي لحظ عينٍ باهر
أعدم نهايات الفِكِر و حْدوده

صورهْ، و لكنْ حسنها الّلي ظاهر
خلاّ المحاسن في البشر معدوده

رِمشٍ لها قلب العذارى قاهر
بين النّسا ما غيرها محسوده

و بين البشر هيْ حور عينٍ طاهر
يا كيف هيْ في أرضنا موجوده !!

أحيانْ أظنّ إنّ الفلا لهْ زاهر
و أحيانْ أظن إنّ الورود وروده

و أحيان أظنّ إنّ القِمرْ هوْ ساهر
يرقب مفاتن حِسنها و خْدوده

يا ليت وَصْفي في كلامي ماهر
و يا ليت يكفي لْوَصفها التّغروده

ذيك الّذي في حسنَها اللّي باهر
تعجز محيطات الشّعر و حْدوده

ساعـة وَعــدْ

لا تخلفي ساعة وَعدْ ..
أنا عدوّ الانتظارْ ..
و لا تكتبي عقب و بعد ..
وش هو بقى من هالنّهار ..
يا ليت في اللّيله قمرْ ..
و يا ليت يبقى هالعِمر ..
الليل قمْرِته فْ ذبولْ ..
و العمرْ وش يبقى إذا
ضاع ف مواعيدٍ تطول ..

طال الطّريقْ ..
ما أقسى الطريق ..
و أنا انتظر مثل الغريق ..
مركب وصولك ما حضرْ ..
يا ليت دربك للّقى،
سهل و حواريّه خِضِر ..
و يا ليتني ما عشتها
لحظة ثواني الانتظار ..
و أنا عدوّ الانتظار ..
ان كنتي ترجين اللقى،
لا تخلفي ساعة وعد ..
للّيل قمره في ذبول ..
و ما ظلّ باقي من نهار ..

العقـــد

نقشت اسمٍ على عقدٍ يطيب لخافقي ذكره
فديت اسمه ترى يسوى ألوفٍ من أسامينا

وعلى صدره لبس عقده يا حظ عقده على صدره
يا ليت انّي مع عقده على صدره تخاوينا

نعيش اللي بقا منا على ما بان من نحره
و لا يمكن أنا و عقده نرا صدره يجافينا

ثلاثتنا نبا نبقى على عهد الوفا عشره
نبات الليل نتسامر و نصبح في تلاقينا

إذا قامت نفزّ لْها .. يطيح النّجم و القمره
يموت الليل و تحيى شمس من نوره تضوّينا

و إذا تنهّد عقب نومه فديت الصوت و النّبره
كناريٍّ صدى صوته تفشى في حوارينا

يشعّ الفرحه الحلوه يبيد الضيق و العبره
ف صوته ماتت أحزانٍ تقطّعنا و تكوينا

و لي قامت تحكّ العين يتني في العقل فكره
أقول اترك أنا الليلة حوي نحره و نادينا

و أشدّ السير لايدينه عسى لو قام هو بكره
يحكّ العين أقبّلها قبل لا العين تسبينا

و تحت رمشه يطيب لنا نخاوي اللّيل و السهره
هدب عينه نسج ظلٍّ شبه ظلمة ليالينا

و على خدّه صفا ثلجٍ و لكن شابته حمره
جريمة واضحة يا ليت مجرمها يراعينا

جمالٍ يفتن العاقل و يسبي العقل من نظره
إذا يرمش أسامينا و توالينا ينسّينا

فديت عيونه الحلوه غزاله و ظبيه و مهره
تلاقت عينهم في عينه اللي دوم تغوينا

و في طوله مع عرضه إذا يقسم على خصره
يلخبط حسبتي و ناتج مجاميعه و باقينا

و إذا يضحك دعيت الله يثبّت عقلي بصبره
و إذا طار العقل منّا وش اللّي هو بقى فينا

أحس بشوفته سَكره و أنا اللّي ما عرف سكره
و أحس عيوني المركب و حسنه شاطئ و مينا

تعبني بعده و طولة مسافات الهوى الوعره
و ذقنا من تباعدنا مراراةٍ تكفّينا

متى يا مهجة عيوني يا أجمل ورده و زهره
متى تلفي مع أمواجك و ترسي في شواطينا

متى ياللي ملكت الروح و إحساس الهوى و شعره
متى تدني مع النسمة و تسكن في أراضينا

و اضمّك بين أحضاني معك يقضي العمر عمره
أبات و صدري يلمّك و نسرح في ليالينا

و أقول و كوننا يشهد يا حظْ صدري على صدره
و أكون اللّي مع عقده على صدره تخاوينا

أقــدار

سبعه الصِّبِحْ .. نوم الجريح احتارْ
و الهمّ مبحر .. مركبه أسرار
و العِمْر ساعة ليتها اللّي هي صِفت
للّي الجفى
شوكٍ على دربه طفى
لكنّها ساعة هجير
و طعمها صوت الولهْ
رجفه تناسيه الدّفى
و قربه لصدّاته شفى .. لكنّها أقدارْ ...

في عينها سافر فؤادي للجنونْ
في عينها نبعٍ شرب حسنه عيون .. و سلّها
تستلهم أيّام العمر .. لكنّها مدّ و جزر
في حضنها تسكنْ
تظنّ الكون في أحضانها نبضه يعيشْ
و إن طعتها تستسلم أوراق المحبّه و الحبر
و تعيشها كذبة أمل
و تحاصرك لحظة غدر
تسلب خيالك ثمْ تطيش
و عقب القصر تسكن عريش
و لا دَرى حالك تفاصيل المصير .. و ما حصل
لكنـّها أقدار ...

سبعه الصّبحْ .. فكر الجريح إنهـار
دمعه تخون و تنسكبْ
تسبق في مجراها الألم
شيٍّ في تفكيره يموت و ينمحي
إحساس قلبه مع شموعه ينطفي
تعبيره و حرفه يصدّ و يستحي
حول الفرح ترقى السما أسوارْ
فوق الظما ما تنزل الأمطارْ
تحت الرماد و جمرته .. قلبٍ تِعبْ
قلبٍ مدى حزنه بصر
لسهيل يرقب غيمته
للشّمس تَحرق شدّتهْ
قلبٍ يتوق لضحكته ..
يرهن لها عمره ثمنْ
قلبٍ رفض كلّ الجفى
و العشق في صدره دفنْ
قلبٍ وِفى .. لكن ترى وش ذا يفيد
إن خانته أقدارْ ...

سبعه الصّبح
يطوي البِعِدْ أسفار
للصّدر ضيقْ و عبرةٍ زوّارْ
صوت المدينة يبتدي
يعزف من ألحان الشوارع أغنيهْ
نومٍ تِثاوبْ راحِته بين الحواري أبنيهْ
كون انشغل بالصّبح لكنْ ما درى
إنـّه صحى يطلب ذراها ..
ما لقاها ..
باعته أقدار ...

سبعه الصّبح .. وين الصّبح ؟؟
دامه شعاع الشمس منها ما شرقْ
دام الهوى و الروح منّي هو سرقْ
ليش الصبح ؟؟
دام الجفا غابةْ محبّـتنا رواها .. ثمْ حرقْ
سبعـه الصبح .. تسعـه الصبح .. عشـره الصبح ..
الوقت من يوم ارْحَلتْ وش هو فرقْ
عمرٍ يمر و عينها النجلا تغيبْ
و الناس تضحك لكن العاشق غريبْ
و اليوم يمضي و لا رضت
ترجع مع الأمطارْ
و ما هي غريبه .. خانته أقدارْ

سهــم البلاكبيــري

يا سَهَم ف بلاكبيري فوق نافذة المسنجرْ
باطلبك وصّل حبيبي بالغلا أجمل عباره

كل منْ ف القائمة خلـّه يولـّي و لا تعبـّرْ
إلا هوْ ذاك الذي له من بيوت القلب حارة

إن نصيته خاف ربّك و اذكره الله أكبر
لا تعين اللي عيونه سحرها يسوى حضارة

و في رموشه لا تحير و لا تقول و لا تفكـّر
أي نعم هو م البشر ما هو خيالٍ و استعارة

و إن حضرته ف الليالي و شفتْ شمس الصبح تنـْوِر
ذاك خـدّه إنْ لفــتْ ظلمــة دجــى ليلـي أنــاره

و إن لمحته مايلٍ بالعود في مشيه تبخترْ
ترتجف أرضٍ وطاها و تخلط الطيب بغباره

ذاك من هُوْ ف الحشا ثابت مكانه ما تغيّر
ذاك من هُوْ زلزل الإحساس و العشق استثاره

إن وصلني من مراسيله و شبّ الليت الأحمر
ترقص الدنيا ف قلبي كالـّذي لاقي بشاره

في وطن قلبي أمير و في حكم روحي تأمّرْ
لو يبا روحي فداه و تحت أمره أو قراره

و لو يبا عيني تدلل آمر و إطلب و أشّر
هذي أو هذي او الثنتين خذ ما هي خساره

الخساره إن مضى يومي و عيني لك تدوّر
ما لقتك و جا ظلام اليوم خذ منّي نهاره

و الخساره إن جفاني صوتكم ياللي يبشّرْ
دايمًا هايم أباه و ضايع بغابة وقاره

و الخساره يوم قلبي لك معاني الحب سطّر
ما لقى من صوب قلبك شيٍّ يرد اعتباره

يا غرور العشق في أمرك أنا دايم أفكر
في حياتي صرت شيٍّ يصعب الشعر اختصاره

لأنـّك أغلى من سكن قلبي بسحره و إنتي أجدر
من ملك قلبٍ عزيزٍ كمْ توفـّق ف اختياره

و لأنك أرحم من همال الغيث في صحرا و أغزر
و لأنك أنقى من صفاء الحور يا نبع الطهارة

و لأنك أحلى، لأنك أسما، لأنك أطيب، لأنك أكثر
من جمَعْ خير المعاني لين صرتي في الصداره

إنتِ شمسٍ من شروقكْ ما قدر ليلي يدثّر
نور عينك عقبها وش عاد بتفيد المنارة

يا سهم ف بلاكبيري فوق نافذة المسنجر
هاك قلبي صوب حبّي وصّله باجمل عباره